ಲೀಡ್ಸ್ನಲ್ಲಿ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಟೀಂ ಇಂಡಿಯಾ ಅದ್ಭುತ ಬ್ಯಾಟಿಂಗ್ ಪ್ರದರ್ಶನದ ಮೂಲಕ ಆಂಗ್ಲರ ವಿರುದ್ಧ ಆರ್ಭಟಿಸಿತು. ಲೀಡ್ಸ್ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧದ ಮೊದಲ ದಿನದಂದು ಭಾರತ ತಂಡ 3 ವಿಕೆಟ್ಗಳಿಗೆ 359 ರನ್ ಗಳಿಸಿತ್ತು. ಇದಾದ ನಂತರ, ಎರಡನೇ ದಿನದಂದು ತಂಡದ ಬ್ಯಾಟಿಂಗ್ ಕುಸಿದು ಮೊದಲ ಇನ್ನಿಂಗ್ಸ್ ಅನ್ನು 471 ರನ್ಗಳಿಗೆ ಆಲೌಟ್ ಆಯಿತು.
ಎರಡನೇ ದಿನದ ಆಟ ಮುಗಿಯುವ ಹೊತ್ತಿಗೆ ಇಂಗ್ಲೆಂಡ್ 3 ವಿಕೆಟ್ಗಳಿಗೆ 209 ರನ್ ಗಳಿಸಿದೆ. ಓಲಿ ಪೋಪ್ ಶತಕ ಗಳಿಸಿ ಅಜೇಯರಾಗಿದ್ದಾರೆ. ಈಗ ಪಂದ್ಯದ ಮೂರನೇ ದಿನ ಬಹಳ ಮುಖ್ಯವಾಗಲಿದೆ. ಮೂರನೇ ದಿನ ಯಾವುದೇ ತಂಡ ಮೇಲುಗೈ ಸಾಧಿಸಿತ್ತೊ, ಪಂದ್ಯದಲ್ಲಿ ಅವರ ಗೆಲುವು ಬಹುತೇಕ ಖಚಿತವಾಗಿರುತ್ತದೆ. ಇಂಗ್ಲೆಂಡ್ ಅನ್ನು ಒತ್ತಡಕ್ಕೆ ಸಿಲುಕಿಸಲು ಟೀಮ್ ಇಂಡಿಯಾ ಮೂರನೇ ದಿನದಂದು ವಿಕೆಟ್ ತೆಗೆಯಬೇಕಿದೆ.
ಯಾವುದೇ ಕಾರಣಕ್ಕೂ ಭಾರತ ತಂಡ ಇಂಗ್ಲೆಂಡ್ಗೆ ಮೊದಲ ಇನ್ನಿಂಗ್ಸ್ನಲ್ಲಿ ಮುನ್ನಡೆ ಸಾಧಿಸಲು ಬಿಡಬಾರದು. ಇದು ಸಂಭವಿಸಿದರೆ, ಪಂದ್ಯದಲ್ಲಿ ಇಂಗ್ಲೆಂಡ್ ಮೇಲುಗೈ ಸಾಧಿಸುತ್ತದೆ. ಮೂರನೇ ದಿನದಂದು ಇಂಗ್ಲಿಷ್ ತಂಡ ಮುನ್ನಡೆ ಸಾಧಿಸಿದರೆ, ಭಾರತ ಎರಡನೇ ಇನ್ನಿಂಗ್ಸ್ನಲ್ಲಿ ಒತ್ತಡದಲ್ಲಿ ಬ್ಯಾಟಿಂಗ್ ಮಾಡಲು ಬರುತ್ತದೆ. ಇದರ ಜೊತೆಗೆ, ನಾಲ್ಕನೇ ಇನ್ನಿಂಗ್ಸ್ನಲ್ಲಿ ಇಲ್ಲಿ ರನ್ಗಳನ್ನು ಬೆನ್ನಟ್ಟುವುದು ಸುಲಭ.
ಭಾರತವು ಶತಕ ಗಳಿಸಿದ ಪೋಪ್ ಅವರನ್ನು ಬೇಗನೆ ಔಟ್ ಮಾಡಿದರೆ, ಇಂಗ್ಲೆಂಡ್ ಮೇಲೆ ಒತ್ತಡ ಉಂಟಾಗಬಹುದು. ನಂತರದಲ್ಲಿ ಹ್ಯಾರಿ ಬ್ರೂಕ್, ಬೆನ್ ಸ್ಟೋಕ್ಸ್ ಮತ್ತು ಜಿಮ್ಮಿ ಸ್ಮಿತ್ ಕೂಡ ಇದ್ದಾರೆ, ಆದರೆ ಪೋಪ್ ಸಾಕಷ್ಟು ಆತ್ಮವಿಶ್ವಾಸದಿಂದ ಬ್ಯಾಟಿಂಗ್ ಮಾಡುತ್ತಿದ್ದಾರೆ. ಹೀಗಾಗಿ ಇವರ ವಿಕೆಟ್ ಭಾರತಕ್ಕೆ ಮೊದಲು ಬೇಕು. ಜಸ್ಪ್ರೀತ್ ಬುಮ್ರಾ ಹೊರತುಪಡಿಸಿ, ಇತರ ಎಲ್ಲಾ ಭಾರತೀಯ ಬೌಲರ್ಗಳು ವಿಕೆಟ್ ಪಡೆಯಲು ಪರದಾಡುತ್ತಿದ್ದಾರೆ. ಭಾರತ ಮೂರು ವಿಕೆಟ್ಗಳನ್ನು ಪಡೆದುಕೊಂಡಿತು ಮತ್ತು ಮೂರು ಕ್ಯಾಚ್ಗಳನ್ನು ತಪ್ಪಿಸಿಕೊಂಡಿತು. ಇವೆಲ್ಲವೂ ಬುಮ್ರಾ ಅವರ ಎಸೆತದಲ್ಲಿ ನಡೆಯಿತು. ಮೂರನೇ ದಿನದಂದು ಅವರು ಜವಾಬ್ದಾರಿಯನ್ನು ತೆಗೆದುಕೊಳ್ಳಬೇಕಾಗುತ್ತದೆ.