ಭಾರತೀಯ ಕ್ರಿಕೆಟ್ ದಂತಕಥೆ ವೀರೇಂದ್ರ ಸೆಹ್ವಾಗ್ (Virender Sehwag) ಮತ್ತು ಅವರ ಪತ್ನಿ ಆರತಿ ಅಹ್ಲಾವತ್ 20 ವರ್ಷಗಳ ದಾಂಪತ್ಯ ಮುರಿದು ಬೀಳಲಿದೆ ಎಂಬ ಸುದ್ದಿ ವೈರಲ್ ಆಗಿದೆ… ಎರಡು ದಶಕಗಳ ದಾಂಪತ್ಯವನ್ನ ಕೊನೆಗೊಳಿಸಲು ಇಬ್ಬರೂ ನಿರ್ಧರಿಸಿದ್ದಾರಂತೆ. ಸೆಹ್ವಾಗ್ ಹಾಗೂ ಆರತಿ ನಡುವೆ 2000ರ ಆರಂಭದಲ್ಲಿ ಪ್ರೇಮ ಕಥೆ ಶುರುವಾಗಿತ್ತು. ಅದ್ಧೂರಿ ವಿವಾಹದೊಂದಿಗೆ ಲವ್ಸ್ಟೋರಿಗೆ ಮದುವೆಯ ಮುದ್ರೆ ಹಾಕಿದ್ದರು.
ಕುಟುಂಬದ ಆಪ್ತ ಮೂಲಗಳ ಪ್ರಕಾರ, ಈಗಾಗಲೇ ಹಲವು ತಿಂಗಳುಗಳಿಂದ ಇಬ್ಬರೂ ಬೇರೆ ಬೇರೆಯಾಗಿ ವಾಸ ಮಾಡುತ್ತಿದ್ದಾರಂತೆ. ಶೀಘ್ರದಲ್ಲಿಯೇ ಇಬ್ಬರ ವಿಚ್ಛೇದನ ಖಚಿತವಾಗಬಹುದು ಎನ್ನಲಾಗಿದೆ. ದಂಪತಿಗೆ ಇಬ್ಬರು ಗಂಡು ಮಕ್ಕಳಿದ್ದಾರೆ. 2007ರಲ್ಲಿ ಹಿರಿಯ ಪುತ್ರ ಆರ್ಯವೀರ್ ಜನಿಸಿದ್ದರೆ, 2010ರಲ್ಲಿ 2ನೇ ಪುತ್ರ ವೇದಾಂತ್ ಜನಿಸಿದ್ದ. ದೀರ್ಘ ಅವಧಿಯ ಕಾಲ ಜೊತೆಯಾಗಿಯೇ ಸಂಸಾರ ಮಾಡಿದ್ದರೂ, ಇತ್ತೀಚಿನ ಬೆಳವಣಿಗಳು ಇವರಿಬ್ಬರ ನಡುವಿನ ಅಂತರ ದೊಡ್ಡ ಮಟ್ಟದಲ್ಲಿ ಹೆಚ್ಚಾಗಿದೆಯಂತೆ.
ಕಳೆದ ವರ್ಷದ ದೀಪಾವಳಿ ಸಂಭ್ರಮದಲ್ಲೂ ವೀರೇಂದ್ರ ಸೆಹ್ವಾಗ್ (Virender Sehwag) ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡ ಫೋಟೋದಲ್ಲಿ ಅವರ ಇಬ್ಬರೂ ಪುತ್ರರು ಹಾಗೂ ಸೆಹ್ವಾಗ್ ಅವರ ತಾಯಿ ಮಾತ್ರ ಇದ್ದಾರೆ. ಯಾವ ಫೋಟೋದಲ್ಲೂ ಅವರ ಪತ್ನಿ ಆರತಿ ಕಾಣಿಸಿಲ್ಲ. ಸೆಹ್ವಾಗ್ ಅವರ ಮೌನವೇ ಇಬ್ಬರ ನಡುವೆ ವಿಚ್ಚೇದನವಾಗುತ್ತಿದೆ ಎನ್ನುವ ರೂಮರ್ಗೆ ಹೆಚ್ಚಿನ ಬಲ ನೀಡಿದೆ.
ಒಟ್ಟಾರೆ, ಒಂದು ಕಾಲದಲ್ಲಿ ಸೆಹ್ವಾಗ್ ಮತ್ತು ಆರತಿ ಅವರನ್ನ ಪರ್ಫೆಕ್ಟ್ ಜೋಡಿ ಎಂದೇ ನೋಡಲಾಗುತ್ತಿತ್ತು. ಅವರ ನಡುವೆ ಬಿರುಕು.. ಡಿವೋರ್ಸ್ ಬಗ್ಗೆ ಇಬ್ಬರೂ ಅಧಿಕೃತ ಘೋಷಣೆ ಮಾಡಿಲ್ಲವಾದರೂ, ಅವರ ಬೇರ್ಪಡುವಿಕೆಯ ಲಕ್ಷಣಗಳು ಹೆಚ್ಚು ಹೆಚ್ಚು ಸ್ಪಷ್ಟವಾಗಿ ಕಂಡುಬರುತ್ತಿವೆ.